Guð heldur mest upp á venjulegt fólk...þess vegna eru svona margir þannig !

Ellen Degeneres

Tue, 07 Apr 2009 14:07:49 GMT

Ég elska Ellen...ekki þannig að ég vilji stinga undan Portiu de Rossi eða neitt þannig...en Ellen er frábær. Þá er ég sérstaklega að meina að spjallþátturinn hennar Ellenar er frábær...mér fannst gömlu gamanþættirnir sem hún var í ekkert svo agalega frábærir, en spjallþátturinn er alltaf jafn skemmtilegur. Ellen er alltaf svo kát og svo byrjar hún alla þætti á því að dansa. Héðan í frá ætla ég að byrja alla daga á því að dansa! ...maður kemst í svo gott skap með því að dansa og ég held að ef maður byrjar daginn á einhverju svona skemmtilegu...þá verður restin af deginu skemmtileg :d

Síðbúið áramótaheit: byrja alla daga á því að dansa :haha:

Annars er ég náttúrulega bara komin suður aftur eftir frábæra helgi á Akureyri og hlakka til að borða páskaegg.

Akureyri :D

Fri, 03 Apr 2009 19:55:39 GMT

Jú sæl...mætt norður í land bara. En þó með naumindum skal ég segja ykkur! Ætlaði að hoppa með flugi í gær, hélt ég væri alveg seif þar sem tvær síðustu vélarnar norður voru ekki full bókaðar. Mætti á flugvöllinn vel tímanlega, ánægð með mig...eeeeen ekki svo lengi. Ég fer að upplýsingaborðinu. Þar heilsar mér kurteis ungur maður. Ég tilkynni það að ég ætli að hoppa norður. Hann horfir á mig í smá stund og segir svo "ég reikna ekki með því að þú komist með, það eru sko þungatakmarkanir á vélunum"! ...ég horfði til baka í smá stund og spurði svo hvort hann væri að reyna að fara fínt í það að segja mér að slaka á í namminu, ef svo væri þá væri þetta mjög léleg tilraun. Hann varð solltið vandræðalegur og reyndi svo að útskýra að það væri sko svo mikill hliðarvindur. Að lokum komst ég þó norður en það var bara af því að nokkrir farþegar voru ekki með neinn farangur (borðaði samt amerískan kleinuhring á flugvellinum í mótmælaskyni).

Mér var að detta í hug eitt af þeim skiptum þegar ég hef verið jafn gasalega orðheppin og ungi maðurinn á flugvellinum. Þá höfðum við Lilja ákveðið að það væri kominn tími til að prófa rapid white tannhvíttunar efni. Við lögðum leið okkar i hagkaup til að fjárfesta í tannfegrunar kreminu. Þegar við komum svo á kassann er þar ungur maður sem afgreiðir okkur. Lilja réttir honum hvíttunar dótið og syr hann svo hvort hann hafi nokkuð prófað þetta. Áður en hann náði að svara datt úr úr mér með nokkuð miklum hæðnistón "sýnist þér það?" Ég fattaði ekki fyrr en við vorum komnar út úr búðinni hvernig þetta hljómaði! Í hausnum á mér var hugsunin sú að hann leit einfaldlega ekki út fyrir að vera maður sem myndi láta gabba sig til að kaupa tannhvíttunar krem sem virkar pottþétt ekki. En auðvitað hljómaði þetta eins og mér findist hann vera með svona hrikalega gular tennur. Lilja skammaðist sín hinsvegar niður í tær fyrir að vera með mér.

Annars er nú ekkert merkilegt að frétta, ég er á Akureyri, búin að borða Brynjuís, fer í fjallið á morgun sama hvort einhver vill koma með mér eða ekki og ég komst að því að Agnes þekkir ekki muninn á Spiderman og Turtles kalli.

Þar til næst,

Sólveig ofurbloggari.

Skjótt skipast veður í lofti...

Tue, 17 Feb 2009 14:55:15 GMT

Já...við erum flutt aftur til Íslands :d Það voru nú ýmsar ástæður fyrir því, aðallega að íbúðin okkar var seld (ekki okkur) og við fundum engan nýjan stað til að búa á....það er alltaf ákveðið vandamál ef maður býr hvergi. Óskar var í fjarnámi frá H.R. og gat í raun bara skipt yfir í staðnám ef við myndum koma til Íslands...og já á endanum var eiginlega gáfulegast að skutlast aftur heim á klakann.

Þannig að, við hófumst handa við að pakka, og pakka og pakka...áttum allt í einu miklu meira dót heldur en þegar við fórum til Svíþjóðar í haust...ótrúlegt hvernig það gerist! Fyrir utan að pakka þurfti líka að sjá um praktísk atriði eins og að panta flug heim og panta flutning fyri dótið okkar og svona, rosa gaman ;)

Okkur tókst á endanum að pakka öllu dótinu okkar og senda það af stað til Íslands. Við gistum hjá Kalla og Fanney síðustu nóttina í Svíþjóð og fengum hjá þeim frábæran mat og mest djúsí súkkulaði köku ever!

Fyrstu vikuna heima héldum við okkur aðallega í Grindavík, bestu þakkir til tengdó fyrir að fá að vera þar :d Pabbi og mamma birtust óvænt í Grindavík daginn eftir að við komum heim...ég hafði nú samt lúmskan grun um að þau væru einhversstaðar á suðurlandi. Talaði við pabba í símann og hann hljómaði voðalega undarlega...sagði að þau væru að kaupa afmælisgjöf handa Bjarka, "fyrir sunnan?" spurði ég..."uuu neeeei" sagði pabbi "við erum bara á Akureyri". En ég vissi að Bjarki var fyrir sunnan í sumarbústað og ég vissi líka að foreldrar mínir kaupa ekki gjafir handa neinum fyrr en í fyrsta lagi þegar þau eru orðin of sein í veisluna, þannig að mér fannst í meira langi undarlegt að þau hefðu drifið sig í búðir á akureyri þegar það var enginn séns að afhenda gjöfina fyrr en einhverjum dðgum síðar...því læddist að mér grunur um að þau gömlu gætu í raun og veru verið á suðurlandi. En það var nú samt mjög óvænt að sjá þau birtast í Grindavík, þau eru best í heimi ;)

Núna höldum við okkur í vesturbæ Reykjavíkur í íbúð Tomma og Stínu...taaaaaaakk Tommi og Stína :haha: Til afþreyingar birtumst við á öllum tímum heima hjá Brynjari og Kristrúnu og heimtum að þau spili við okkur :haha:

Annars er þetta það helsta sem er að frétta af okkur í bili held ég.

Að lokum vil ég segja TIL HAMINGJU AGNES OG LÚLLI sem voru að eignast fullkomna litla prinsessu síðasta sunnudag :haha: ...verð að drífa mig norður til að kíkja á gripinn og fara á skíði :d

...vorið nálgast ;)

Fyrsta bloggið á nyju ári :)

Mon, 26 Jan 2009 11:13:26 GMT

Jæja...heldur langt síðan ég bloggaði síðast...en sem afsökun hef ég að við vorum náttúrulega á Íslandi slatta af tímanum.

En allavega...á maður að fara yfir hvað hefur gerst frá síðasta bloggi? Já, held það bara.

Ég bloggaði síðast í nóvember, þá vorum við með innflutningspartý og fjör. Svo snjóaði smá, sem þótti nógu merkilegt til að festa það á filmu.

En svo í lok nóvember komu mamma og pabbi í heimsókn og þá var ennþá meira flör :d Gömlu flugu að sjálfsögðu til Köben og tóku lestina hingað. Við röltum útá lestarstöð og fundum þau loksins eftir að pabbi reyndi að útskýra fyrir okkur hvar þau væru með því að segja "það er svona torg með full af hljólum beint fyrir framan okkur" ...jájá það eru svona 100 staðir sem það á við um í Lundi. En við fundum þau nú samt...aðallega af því að við erum svo hrikalega klár :haha: Daginn eftir, sem var sunnudagur, fórum við í smá útsýnisrölt um Lund og kíktum á jólastemminguna. Við sáum meðal annars jólauppboð lions manna, sem voru hrikalega smart í gulum samfestingum :haha:

Á mánudeginum skruppum við í Nova Lund (verslunarmiðstöð), en þar gátu óskar og pabbi dunað sér við að þrífa skóna sína meðan við mamma kítum í búðir :haha:

Á þriðjudeginum fórum við svo öll yfir til Köben. Við ætluðum svo bara að koma aftur til Svíþjóðar um kvöldið en mamma og pabbi ætluðu að vera í Köben fram á fimmtudag. Verkaskipting ferðarinn var mjög einföld hjá gömlu, mamma sá um sænska peninga og pabbi sá um danska peninga. Mamma var búin að standa sig mjög vel með sænsku peningana það sem af var ferðinni, en pabbi var ennþá í smá sjokki eftir að hann borgaði morð fjár fyir pylsu og bjór á Kastrup. En allavega, við mætum til köben, finnum hótelið þeirra og erum alveg að koma að hurðinni þegar pabbi stoppar allt í einu. Leitar í öllum vösum og töskum, og segir svo "vitiði hvar veskið mitt er?...það er í Svíþjóð!" Þetta leystist með því að mamma notaði vísa sem tryggingu fyrir hótelherberginu og sipti sænsku peningunum sínum í danska...það var nebblega ekkert hægt að skipta íslenskum peningum þar sem þeir voru enn núll króna virði samkvæmt skiptibúllunum á strikinu. Eftir að þessu hafði verið reddað röltum við um kaupmanahöfn og tékkuðum á jólastemmingunni þar...ég gleymdi myndavélinni heima og allar myndir voru því teknar á símann hans Óskars. Sá sími fór hinsvegar í verkfall um jólin og var því skilinn eftir á íslandi þannig að ég á engar myndir frá Köben í bili...set þær inn seinna :d Til að geta séð fyrir sér restina af tímanum í Köben þá komu mamma og pabbi með okkur aftur til Svíþjóðar, náðu í veskið og fóru svo aftur til Köben...tveimur dðgum seinna komu þau aftur til Svóþjóðar, oooooog tveimur dögum eftir það fóru þau aftur til Köben og þaðan heim. Síðustu tvo dagana í Svíþjóð fórum við annan daginn til Malmö og hinn daginn bara röltum við um og skoðuðum jólastemmingu í Lundi.

Óskar fór hem daginn áður en pabbi og mamma fóru heim...nú og svo fóru þau heim, þannig að þá var ég ein eftir í Svíþjóð í heila 11 daga. Ég gerði nú voðalega fátt merkilegt á þeim tíma nema læra fyrir eitt próf, fara í prófið og svo klára að kaupa jólagjafir.

Ég kom svo loksins til Íslands 18. desember :haha: Ferðin gekk vel fyrir utan að taskan mín var svo hrikalega þung að ég mætti alveg bullandi sveitt á lestarstöðina eftir að hafa dregið töskuna yfir hálfan Lund...missti ef lestinni sem ég ætlaði að taka af því að það tók lengri tíma en ég hélt að draga svona þunga tösku og svo þegar ég kom á Kastrup hélt taskan áfram að vera með leiðindi og ég endai með yfirvikt. það vildi hinsvegar svo heppilega til að ég þekkti íslendinga í röðinni og þau buðust til að tékka sig inn með mér þannig að yfirviktin mín dreifðist á þau og ég slapp við að borga :haha: Taaaaaakk Bóas og félagar :d Ég komst svo á endanum alla leið til Grindavíkur og fékk einkatónleika hjá Óskari og bræðrum hans :haha:

Óskar og Brynjar

Óskar og Jóhann

Ég var svo fyrir sunnan í tvo daga og fór norður 20. desember :haha: Það var að sjálfsögu yndislegt heima um jólin og áramótin voru ekkert síðri. Þegar ég kom norður var fullkominn jólasnjór...en hann fór akkúrat tímalega til að það væri enginn snjór klukkan 18 á aðfangadag! Smááá svekkelsi með það, en ég náði allavega myndum af jólasnjónum :d

22. desember komu barnabörnin í smá jólaföndur. Pabbi fékk þjálfun í snjókarlagerð hér í Svíþjóð og miðlaði af visku sinni til barnabarnanna.

Sólrún Svava vandar sig við að mála.

Sunneva vandar sig við að mála.

Og Ágúst Óli vandaði sig líklega mest við að mála :d

Helga Björg að skoða jólaskraut...hún var ekki með í að föndra en ég ákvað að skella inn mynd af henni samt :d

Svo komu áramótin og allur hópurinn var heima í Græna húsinu :haha:

Sunneva

Pabbi tekur því mjög alvarlega sem sagt er í áramótasöngvum, "bleikar lýsum grund" segir í laginu...og það gerði hann

Barnabörnin fengu að vera með í bleiku stemmingunni undir stjórn Kjartans

Ég fór svo suður á þrettándanum og við fórum aftur til Svíþjóðar 10. janúar. Ásta vinkona vann tveir fyrir einn í brúnkusprey þarna í janúar og vantaði einhvern til að koma með sér til að hún gæti nú nýtt þetta tilboð. Þannig að ég sló til...hafði aldrei prófað áður og reyndar ekki Ásta heldur. En árangurinn af þessu má sjá á næstu mynd :haha:

Svo leiddist okkr smá í flugvélinni þannig að við tókum smá myndaflipp :haha:

Síðan við komum til Svíþjóðar erum við nú aðallega búin að vera að læra. Óskar byrjaði í fjarnámi í tölvunarfræði í HR og ég er að taka sálfræði áfanga. Helstu fréttir þar fyrir utan er að það er búið að selja íbúðina okkar þannig að við erum að vinna í íbúðamálum núna og sjáum til hvað gerist í framhaldinu...rosa spennó ;)

Já, ég held að þetta sé orðið fínt í bili. Blogga meira fljótlega og vonandi verður þá komið á hreynt hvort við fáum íbúð eða hvað :d

Veriði góð og munið að vorið nálgast :haha:

Sólveig skrifar loksins blogg...

Sun, 16 Nov 2008 17:26:41 GMT

Jæja gott fólk, hér kemur loooooksins blogg :haha:

Já, það er nú ýmislegt búið að gerast síðan Óskar jók á leti mína með því að skrifa blogg fyrir okkar hönd. Síðast þegar ég skrifaði var Elísa í heimsókn og við vorum að hugsa um að fara á ströndina og leika okkur...sem við gerðum :haha:

Síðan komu Rut og Gunnsi í heimsókn. Óskar sagði frá því í blogginu sem hann skrifaði og ég held að ég hafi bara engu við það að bæta:d

En svo koma nú aðal fréttirnar. Haldiði ekki að við séum bara flutt inn í Lund ! ...hefði nú haldið það ! Fengum æðislega íbúð á besta stað í Lundi. Talsvert mikið minni en húsið sem við bjuggum í, líklega á stærð við helminginn af neðri hæðinni...og það er frábært:d

Þessi mynd sýnir mín viðbrögð við því að fá íbúðina...bakaði kartöflur og dansaði happy dansinn :haha:

Til að fá íbúðina þurftum við að borga tvo mánuði fyrirfram, og það var nú ekki alveg það einfaldasta í heimi. Í stuttu máli var ferlið svona:

- hafa samband við bankana okkar á íslandi og biðja fallega um að fá að millifæra pening til útlanda

- óskar þurfti að skrifa undir pappíra þannig að við snöruðum okkur í bæinn, keyptum ódýrasta prentarann sem vill svo heppilega til að er líka skanni, prentuðum út pappírana, Óskar skrifaði undir, skönnuðum þá aftur inn og sendum til baka.

- Fimm dögum síðar var peningurinn frá Óskari kominn inn á sænska reikninginn.

- Daginn eftir það kom minn peningur inn á reikninginn.

- Biðum einn dag eftir að komast í peninginn þó að hann væri kominn inn á reikninginn.

- Borguðum loksins manninum sem á íbúðina...en hann fékk ekki peninginn fyrr en daginn eftir það því að það tekur sko sólarhring að millifæra peninginn. Afhverju tekur sólarhring að millifæra pening spyrja kannski einhverjir...jú af því að maðurinn sem á íbúðina er ekki í sama banka og ég og það tekur sko lengri tíma að millifæra pening á milli banka.

Hér er Óskar með nýja prentarann, tilbúinn að skrifa undir.

Já, það má segja ýmislegt um íslenska bankakerfið...allskonar smáatriði eins og þetta með að fara á hausinn og svona...en fjandinn hafi það þeir eru með góða þjónustu !!

Já, svo tóku viðflutningar. Við vorum ekki lengi að taka saman dótið okkar, skutla því í bílinn og hlaupa með það upp í nýju íbúðina.

Eina vandamálið var að við eigum ekkert rúm. En ekkert mál, við búum nú einusinni í Ikea landinu. Þannig að við fórum, ótrúlegt en satt, í okkar fyrstu Ikea ferð síðan við komum til Svíþjóðar :haha: Fórum á ljóshraða í gegnum Ikea, fundum rúm og dýnu og hlupum út. Komum kössunum með rúmgrindinni fyrir inni í bílnum, flatir pakkar frá Ikea klikka náttúrulega ekki...en svo var það dýnan...hmmm hvað á að gera við dýnuna? Jú, við skelltum henni á toppinn :haha: ströppuðum hana niður og brunuðum af stað.

Um leið og við komum út á hraðbrautina og hraðinn fór yfir 80 byrjaði dýnan að lyftast skuggalega mikið og ef ég hefði ekki verið að sinna starfi mínu sem eftirlitsmaður hefði hún líklega tekist á loft á miðri hraðbraut. Ég veit að það eru ekki hraðbrautir á Íslandi, en það er ekki vinsælt að sleppa þar lausum fljúgandi dýnum...þykir einfaldlega ekki kurteisi hér í Svíþjóð, eins undarlega og það hljómar;) Við stoppuðum, endurbættum ströppunartæknina og pössuðum okkur að fara ekki yfir 80...vorum hrikalega vinsæl :haha: ...og já kannski best að bæta því við að það var ausandi helli rigning sem gerði ströppunar æfingarnar á hraðbrautinni ennþá skemmtilegri, sérstaklega þegar stórir bílar keyrðu framhjá :haha:

Daginn eftir fórum við í Ikea ferð númer tvö aft því að það vanntaði svona smáatriði eins og botninn í rúmið. Í þessari ferð tókum við okkur aðeins lengri tíma til að rölta um og að sjálfsögðu var tekin matarpása og etnar kjötbollur (tæknilega séð Sænskar kjötbollur, en af því að við erum í Svíþjóð þá heita þær bara kjötbollur sko).

Alex sem á íbúðina skildi eftir ýmis húsgögn...misfalleg. Í ófríðari kanntinum má nefna tvo hægindastóla sem eru með þessu líka fína blóma/ PÁFAGAUKA mynstri...en hann skildi líka eftir annsi fínt sjónvarp sem bætir algjörlega upp fyrir páfagaukana :haha: Við áttum hinsvegar enga fleiri stóla þannig að við röltum út í Eiríks hjálpina og keyptum notaða stóla með voða fínu grænu áklæði...passa rosalega vel við glerborðið sem Alex skildi eftir hahaha :haha:

Á föstudaginn héldum við svo "smá" innflutningspartý og buðum fólkinu úr sænskutímunum okkar. Það komu miklu fleiri en við bjuggumst við en þrátt fyrir það var þetta frábært partý ! Myndaðist frábær stemning af því að allir eru nýir í Svíþjóð og allir eru að reyna að kynnast nýju fólki. Margir töluðu um það að þeir hefðu aldrei farið í partý þar sem allir væru svona rosalega hressir og vingjarlegir. Við náttúrulega sögðum að öll íslensk partý væru svona ;)

Taka sig til fyrir partý :haha:

Fanney og Kalli voru boðin í mat fyrir partýið...þau lögðu það á sig að halda á fjórum þungum stólum alla leiðina hingað...Fanney var að drepast í höndunum allt kvöldið. Takk Kalli og Fanney :haha:

Óskar kóngur og Sólveig prinsessa :haha:

Eftir matinn tóku kóngarnir og prinsessurnar smá Mario Kart keppni.

Talið frá vinstri til hægri eru á þessari mynd: Kalli Kóngur, Thomas sænski, Martin svissneski, Johan sænski, Fanney Majones, Douglas og ljóshærða kærstan hans og svo sést í hnakkann á Evelina frá Rússlandi.

Hér er stór hópur þjóðverja og einn Rússi.

Kalli, Fanney, Sólveig og Óskar...konungborinn hópur :haha:

Kalli, Óskar og Sólveig í rosalega góðum gír !

Indra Maria og Leonie frá Þýskalandi spjalla við Satesh frá Indlandi. Í bakgrunninum má sjá páfagaukastólana frægu :haha:

Einhvernvegin myndaðist rosalega góð stemning fyrir því að sitja á gólfinu og spjalla. Á þessari mynd er fólk frá Íslandi, Þýskalandi, Ástralíu, Bandaríkjunum og Hong Kong.

Tveir af þremur Svíum sem mættu í partýið :d Thomas sem er í háskólanum með mér og kærastan hans Douglas sem er í sænsku með Óskari...hún er mesta krútt í öllum heiminum :haha:

Já gott fólk, þannig er nú það og þetta var helst að frétta. Við aðallega búin að vera í skólanum og hægt og rólega að koma okkur fyrir í nýju íbúðinni. Annars erum við bara rosalega hress, eða "pigg" eins og maður segir á sænsku. Erum farin að hlakka til að fá pabba og mömmu í heimsókn og líka farin að hlakka mikið til að koma heim um jólin:d Planið er að vera bara í sitthvorum landshlutanum alveg fram yfir áramót. Mamma hringdi í mig um daginn og var að spyrja út í þessi mál, svona hvað við hefðum hugsað okkur að gera og sagðist ekkert verða fúl þó að ég myndi vera eitthvað fyrir sunnan og að við mættum bara hafa þetta eins og við viljum. Ég sagði henni eins og er að við ætluðum bara að vera á sitthvorum staðnum allan tímann. Þá kom smá þögn í símann og svo sagði mamma"já, þið eruð aldeilis bjartsýn!" hahahahaha En svona er nú engu að síður planið, ætlum bara að njóta þess að vera með vinum okkar og fjölskyldum yfir jól og áramót og hlakka til að hitta hvort annað eftir áramót :haha: ...og munum örugglega nýta okkur það í botn að hringja frítt hvort í annað ;)

Jæja, held að þetta sé komið gott í bili...reyni að standa mig betur og blogga aftur fjótlega. Farið vel með ykkur elskurnar mínar.

Kärlig hilsen,

Sólveig og Óskar :haha:

Óskar skrifar ...

Fri, 17 Oct 2008 21:42:36 GMT

Sæl verið þið 8)

Ég ákvað að taka Sólveigu til fyrirmyndar og kasta af mér eins og einu bloggi. Lífið gengur að mestu sinn vanagang hérna hjá okkur fyrir utan að okkur hefur nokkrum sinnum verið vísað úr verslunum og strætisvögnum vegna þjóðernis. Við reynum nú samt bara að líta á björtu hliðarnar. Annars komu mamma og pabbi í heimsókn um daginn við mikinn fögnuð okkar og innfæddra. Þau komu reyndar í miðri efnahagsringulreiðinni og voru greinilega búin að missa allt fjárhagslegt vit sem sást vel þegar þau reyndu að greiða fyrir mat með klappi á bakið og brosi. ;)

Við kíktum með þau til Malmö þar sem við splæstum m.a. í risastóra elgs-borgara sem eru hreint ekki slæmir. Snemma á laugardagsmorgninum (11:00) lögðum við svo af stað ef strætisvagni frá Sjöbo og áleiðis til Lundar. Í Lundi rétt misstum við af lestinni sökum snúðakaupa, en við hinkruðum bara eftir næstu. Við enduðum svo á Hovedbane lestarstöðinni og röltum á safn rétt við ráðhústorgið.

Á safninu var ég beðinn um að taka mynd af mömmu og pabba í egypska hlutanum. Pabbi gerði sér lítið fyrir og hlammaði sér á stein/styttu sem er um 3.500 gömul og brosti sínu breiðasta ... skildi lítið í svipnum á mér og mömmu :haha: Pabbi er reyndar með þá mynd á sinni vél...þið verðið að sjá hana hjá honum.
Síðan röltum við eftir Strikinu einmitt þegar flestar búðir voru að loka (góð tímasetning pabbi) og þar sá ég svolítið sem minnti á stigatöflu úr Eurovision, en svo kom í ljós að þetta voru bara gengi gjaldmiðla.

Síðan gengum við niður á Nýhöfn og á leiðinni benti pabbi okkur á hús sem að Íslendingar áttu á tímum íslensku gullaldarinnar.

Einnig var farið með gestina í Hannes&Margeir enda fátt sænskara, og pabbi sýndi okkur nýtt hverfi í Malmö þar sem Svíar eiga einn snúinn skýjakljúf. Svo má ekki gleyma einu sem pabbi og við strákarnir gerum þegar komið er til útlanda...við kíkjum í alla kæla í stórmörkuðum í von um að þekkja einhvern af fiskunum. Við pabbi gerðum það einmitt í Coop í Sjöbo, innfæddum til mikillar furðu.

Annars erum við Sólveig á fullu í að finna okkur íbúð í Lundi eða nálægt fyrir næstu önn...þolinmæðin dugir ekki endalaust í 2-4 klst í strætó á dag :cry: Við erum mjög líklega búin að læsa inn stað í Staffanstorp sem er 10km fyrir utan Lund sem við gætum fengið. Ætlum að skoða það mál núna um helgina. Þið getið séð á þessu frábæra korti staðsetningarnar hérna hjá okkur
Sjöbo = Búum 8km n-a frá Sjöbo
Lund = Lærum þar
Staffanstorp = Erum að skoða íbúð þar

Sólveig tók sér það bessaleyfi í fyrradag að skrá okkur bæði í stjórn Íslendingafélagsins hérna í Lundi. Það verður nú örugglega bara gaman. Var Jóhann ekki Íslendingafélagi þegar hann bjó í Skotlandi? Hann getur ábyggilega gefið okkur góð ráð.
Skepnan (bíllinn okkar) gengur eins og Rolex þrátt fyrir að hafa aðeins kvartað yfir fjölgun farþega þegar M&P voru í heimsókn með því að sprengja eitt dekk á sjálfri sér. Eftir góðan göngutúr þar sem mamma og Sólveig komust upp á kannt við einn nágranna skiptum við pabbi um dekk í einum grænum og bíllinn er hættur að nötra eins og hann gerði :)

Við Sólveig biðjum allavega að heilsa í bili og viljum biðja fólk um að halda sínum vefsíðum "up to date" ;)

Fyrsta heimsóknin :)

Fri, 26 Sep 2008 21:26:14 GMT

Það er nú það, fyrsti gesturinn okkar er mættur og ber þjónustunni vel söguna. Elísa Bestasta Gyrðisdóttir birtist bara hér á tröppunum á þriðjudaginn, eins og þruma úr heiðskýru lofti! ...eða næstum, hún birtist á lestarstöð í Malmö og ég vissi af því í 24 klukkustundir áður en hún kom...en það var samt frekar óvænt :haha: Þetta átti sko að vera svaka leindó á milli Elísu og Ofur Óskars, en á mánudaginn þá var frekar pirrandi dagur hjá mér og ég var ekkert í besta skapi í heimi þegar ég kom heim. Þannig að Ofur Óskar ákvað að kæta mig og sagði mér að hann vissi kannski eitthvað sem kæmi mér í betra skap. Svo sagði hann "Elísa kemur á morgun!", og ég sagði "Óskar, það er ekki fallegt að ljúga svona hlutum að fólki!". Og það tók svona fimm mínútur fyrir Ofurmennið að sannfæra mig um að Elísa væri að koma og að hann væri ekki að ljúga :haha: Þegar ég trúði honum loksins fór ég að gráta af því að ég var svo glöð;)

Svo kom Elísa á þriðjudaginn og við náðum í hana til Malmö. Kíktum aðeins í búðir í Malmö og keyrðum í gegnum Lund á leiðinni heim. Svo var aðallega afslöppun það sem eftir var af þeim degi og ég gerði Elísu háða Grey´s Anatomy með því að láta hana byrja að horfa á fyrstu seríuna. Ótrúlegt en satt þá hafði stúlkan alveg misst af því að horfa á þetta, en engar áhyggjur, núna er hún langt komin með aðra seríu og er djúpt sokkin. Fer að nálgast það að verða jafn djúpt sokkin og Agnes, en fyrir þá sem ekki vita þá eiga Agnes og dr. Shepard í leynilegu ástarsambandi.

Á miðvikudaginn fór ég í skólann um morguninn og svo skruppum við öll inn í Lund í skoðunar og búðaferð. Á leiðinni í Lund komum við aðeins við á Stöndinni okkar góðu.

Í gær fór ég líka snemma í skólann og svo vorum við bara hér að hanga, Óskar fór á æfingu og við Elísa fórum í saklausan göngutúr um sveitina. Það kom svo í ljós að svona sveitagöngur eru ekki alveg hættulausar og það var var eins gott að við vorum í hlaupaskónum! Einhverjir muna kannski eftir því að hafa lesið um það hér á blogginu þegar Ofur Óskar fór út að hlaupa og kom heim skelfingu lostinn eftir að hann komst að því að kýrnar í hverfinu eru ekki sáttar við skokkara. Nú við Elísa erum þessum líka fína rólegheita göngutúr, fallegt sólarlag og hvaðeina.

Svo komum við að stóru túni, með fullt af kúm. Þær eru allar að hanga saman í horninu við veginn langt í burtu frá okkur. Við göngum áfram eftir veginum í áttina að kúnum. Allt í einu tekur ein kýrin eftir okkur og byrjar að stara.

Svo fara fleiri kýr að stara. Og svo byrja þær að færa sig á móti okkur. Á endanum stóðum við á veginum og svona 20 kýr stóðu á túninu beint fyrir framan okkur. Og þetta voru engar venjulegar kýr...sumar voru með keðjur svona eins og múll á hesti og ein var rosalega stór og með hring í nefinu og keðju sem hékk úr hringnum...gæti hafa verið naut en þó án horna. Og svo byrjar þessi stærsta að gefa frá sér ónáttúruleg hljóð...þetta var ekki eins og neitt baul sem ég hef heyrt og þá komu allar beljurnar nær gyrðingunni og stóðu þar og störðu á okkur. Mynntu solltið á gengi af vandræðaunglingum frá 80 og eitthvað, pönkara gengi með keðjur um hausinn...hefði líklega verið í rifnum gallabuxum og skítugum leiðurjökkum ef þær gætu.

Kannski ágætt að minnast á það að girðingin var ekkert upp á marga fiska. Einn aumingjans vír sem skildi að okkur og hóp af gothara beljum í vígahug!

Þarna var okkur alveg hætt að standa á sama og Elísa var ekkert mikið hrifin af ljósmyndunar gleðinni hjá mér. Þannig að við ákváðum að snúa bara við og halda heim á leið. En kýrnar vildu greinilega fullvissa sig um að við hypjuðum okkur í burtu og eltu okkur alveg eins langt og þær mögulega komust.

Og svo stóð ein svon á verði í horninu á túninu til að passa að við færum alveg örugglega. Sænskar kýr eru skrýtnar!

Í dag var svo ákveðið að skreppa í menningarferð til Köben. Röltum Strikið, fengum okkur yndislegar pizzur og lasagna á Mama Rosa, kíktum í búðir og höfðum bara almennt gaman :haha:

Á leiðinni heim í strætó sátu fyrir aftan okkur tveir ungir menn af Afrískum uppruna. Þeir virtust ekki vita hvað heyrnartól eru og kusu að láta hip hop hljóma um allan strætóinn. Þetta fannst okkur Elisu mjög fyndið, sérstaklega þar sem hip hop er ekki beint sá tebolli sem Ofur Óskar kysi helst að drekka og var hann á endanum orðinn frekar þreyttur á hávaðanum fyrir aftan okkur. Á tímabili voru drengirnir meira að segja að nota báða símana sína til að spila tónlyst, sem hefði geta aukið á gæði hljómburðarins...ef þeir hefði verið að spila sama lagið;) Þeir héldu uppteknum hætti alveg þangið til þeir fóru út úr strætó...sem var á næstu stoppistöð á undan okkur.

Já, svo er plan morgundagsins að fara í piknik á ströndina, byggja sandkastala og kíkja út á Lífið í lundi með sand í skónum :haha:

Ef þetta blogg vakti upp löngun hjá einhverjum til að koma í heimsókn...komiði þá! Hér er jafnvel meira í fjör í alvörunni heldur en á blogginu! Ég veit, hljómar ótrúlega en er dagsatt ;)

Kennitalan komin í hús

Wed, 17 Sep 2008 16:55:54 GMT

Já, þá erum við loksins formlega orðin Svíar, komin með sænskar kennitölur vei vei vei :haha: Merkilegt hvað kennitala er mikilvægt fyrirbæri. Reyndi um daginn að leigja litla ómerkilega dvd mynd. Svona eitt af þessu litla í lífinu sem getur verið skemmtó, nammi og Hollywood myd. En var það hægt? Óhó nei held nú ekki. Gömul beygla að vinna á einu vídjóleigunni í Sjöbo sem sagði ekki einu sinni "leiðinlegt að geta ekki aðstoðað þig", eða "ég vildi að ég gæti gert eitthvað"...nei hún sagði bara "you need person nummer" og virtist bara skemmta sér ágætlega yfir því að geta ekki leigt mér myndina. Sagðist ekki geta vitað hvar ég ætti heima ef hún fengi ekki kennitölu...ég sagði að ég gæti nú bara sagt henni heimilisfangið, en henni fannst það eitthvað fyndið og sagði að það væri ekki nógu gott fyrir sig! Reyndi líka að kaupa mér kort í líkamsræktarstöð, eeeeen það var ekki hægt heldur, þarf hvorki meira né minn en bæði kennitölu og sænskan bankareikning til þess! Fór í dag í bankann í tilefni af því að kennitalan er loksins komin, og þá þarf að fá staðfestingu á skólavist frá skólanum og mæta með vegabréf til að geta stofnað reikning. Þannig að það er alltaf nóg að gera. Planið er þá að fara fyrst í skólann, fá þá til að staðfesta veru mína þar, fara svo í bankann og biðja fallega um að fá að opna reikning og fara svo í ræktia og fá fullgildan aðgang þar :haha:

Annað nýtt að frétta er að Óskar sótti um nám í hagfræði á komandi vorönn og er búinn að skrá sig á sænsku námskeið 29 september. Ég ætla að reyna að nýta mér mylsnuna af matarborðinu og fá a kíkja á námsefnið sem hann fær á námskeiðinu. Það er alveg fyndið hvað það er pirrandi að flytja til lands í skandinavíu. Maður mundi halda að það væri auðveldara að komast inn í tungumálið...en það er bara svo hrikalega pirrandi að skilja NÆSTUM hvað allir eru að segja! Það er allt annað mál ef maður flytur til rússlands og bara skilur ekkert og það verður að hafa það. Hér finnst manni eins og maður ætti alveg að skilja og tala...en maður gerir það ekki! Þetta er eins og að standa fyrir utan glugga og heyra óminn af samtali fólks. Maður heyrir nóg til að vita um hvað er verði að tala en maður getur ekki náð öllu sem fer fram...hrikalega pirrandi að geta ekki bara opnað hurðina og gengið inn! Eins og einhver sagði, Guð gefi mér þolinmæði...núna strax! :haha: Við erum samt loksins komin með sænskar sjónvarpsstöðvar og það hjálpar vonandi til við að læra Sænsku. Fínt að horfa á sænska Idolið og fréttirnar og svona til að komast aðeins inn í hlutina :haha:

Einnig er skemmtilegt að segja frá því að pabbi og mamma hafa í fyrsta skipti á ævinni ákveðið dagsetningu á ferðalagi lengra en tvær vikur fram í tímann. Þau munu kíkja í heimsókn til okkar 29. nóv til 6. des, hlakka agalega mikið til að fá þau í heimsókn ! :haha: Ef einhverjir fleiri vilja kíka í heimsókn þá er það guðvelkomið:d

Annars er nú fátt nýtt að frétta. Nema kannski að Óskar hetja drap kakkalakka í kjallaranum! Ofur Óskar var að fara niður með þvott (eins og alltaf þegar nýjar dýrategundir finnast í húsinu) og sér hann þá ekki kakkalakka úti á miðju gólfi. Hann deyr ekki ráðalaus heldur grípur það sem hendi er næst, sem var blessunarlega sög, og hvorki meira nér minna en heggur kvikindið í tvennt! Óskar hefur nú öðlast ofurhetju stöðu í mínum huga og verður hér eftir kallaður Ofur Óskar eða The Amazing Oscar, eftir því hvað hentar betur.

Þá er það helsta komið í bili...held ég. Endilega haldið áfram að vera dugleg að kommenta, alltaf svo hrikalega gaman að lesa komment :haha: ...og ég skal reyna að fara eftir eigin ráðleggingum og kommenta þegar ég skoða síður hjá öðrum. Er fastagestur á hinum ýmsu bloggum en læt sjaldan vita. Vinn í þessu í framtíðinni :haha:

Peace out;)

Í alvörunni...nóóóóg að gera í Svíþjóð!

Sat, 06 Sep 2008 17:55:25 GMT

Í gær var afar áhugaverur dagur, svo ekki sé meira sagt. Hann byrjaði mjög venjulega, vakna, morgunmatur, strætó og allt það. í skólanum fékk ég hinsvegar afar áhugaverðar upplýsingar! Deildin er með samning við dýragarð í nágrenninu...og það er hægt að gera tilraunir á alvöru lifandi öpum!!!!! Ég fékk umsvifalaust svona Scrubs móment þar sem ég datt alveg út og sá fyrir mér sjálfa mig að gera rosalega merkilegar og vísindalegar tilraunir með öpum sem elska mig og eru vinir mínir. Í framhaldinu sá ég fyrir mér mynd úr kennslubók sem ég man skýrt og greinilega að hafði fyrirsögnina "Köhler og aparnir", nema að í minni útgáfu var það ég en ekki Köhler sem faðmaði apann. Klukkan 11 var tíminn búinn og ég átti að fara í annan tíma klukkan 13 þannig að ég hafði smá tíma til að drepa þarna á milli. Ég skrapp á stúdenta kaffihúsið og fékk mér stúdenta te og stúdenta möffins. Einnig fylgdi ferðinni sá óvænti glaðningur að ég fann loksins stúdenta bóksöluna, hverjum hefði dottið í hug að hún væri bara þarna á miðju háskóla svæðinu! :haha: Þar sem ég sit þarna með mitt stúdenta te, þá fer það ekki framhjá mér að það er að fara að vera einhverskonar kynningar dagur. Fullt af bönkum og símafyrirtækjum og vinnumiðlunum að setja upp kynningarbása út um allt. Þannig að ég ákveð að bíða og sjá hvort að ég geti lært eitthvað fleira gagnlegt þennan daginn, þó að það sé frekar erfitt að slá út fréttirnar um apatilraunirnar, en ég meina, ég er bjartsýn að eðlisfari. Að lokum virtust allir vera um það bil tilbúnir og ég tek rúnt um svæðið, þetta venjulega, fæ fullt af nammi og pennum. Taldi mig svo hafa skoðað allt sem var í boði og fer út. Fyrir utan er fullt af fólki og greinilega allir að bíða eftir því að komast inn (þaðan sem ég var að koma) og það stendur á spjaldi að húsið opni klukkan 12:15. Ég var geðveikt ánægð með mig, búin að fá forskot á alla hina (nema hitt fólkið sem var inni nógu snemma eins og ég). Skoðaði mig um í smá tíma úti. Þar var líka nóg um að vera, einhverjir með kynningar úti, einhver með póní hest (lifandi) sem átti að giska á hvað væri þungur, fólk að spila á hljóðfæri og svona bara...almenn gleði.

Svo opnar húsið og ég varð mjög hissa á því hvað allir voru æstir að komast inn á leiðinlegar fyrirtækja kynningar. Svakalega löng röð mynaðist við báða innganga og ég veit ekki hvað. Ég hló smá að þessum kjánum "hahaha ég er sko búin að fá mína penna" huxaði ég, góð með mig og fylgdist aðeins meira með hestinum. Og svo...svo kom hljómsveitin. Skólahljómsveit, hvorki meira né minna í búningum (úniformum, eins og Sandra myndi kalla það) og þau stilla sér upp til að spila. Ég varð vægast sagt forvitin. "Hljómsveit segið þið" hugsaði ég með mér, "oh really" (hugsað með tón sem gefur til kynna að ég hafi einhverskonar áætlun). Og hljómsveitin byrjar að spila, en það er ekki allt, gott fók. Með hljómsveitinni koma sex nokkurskonar klappstýrur...og þær eru með rútínur fyrir öll lögin! Lögin eru til dæmis uppbeat hljómsveitarútgáfa af YMCA og fleiri slagarar. Gott fólk...hér kemur svo brandarinn, ég hló upphátt þegar ég tók þá ákvörðun...að sækja um inngöngu í hjómsveitina :haha: Mér var sagt að einu kröfunar væru að kunna að halda á hljóðfæri...þannig að nú er bara að vona að það sé pláss fyrir eina flautu enn ;)

Þegar ég sótti um inngöngu í þessa ofursvölu hljómsveit fylgdi mér herramaður sem spilar á trompet að kynningarbásnum þeirra til að sækja um. Við förum inn í troðninginn og hann stefnir að stiganum..."ó, er lika eitthvað á efri hæðinni" segi ég. Hann lítur á mig frekar hissa og segir "já...reyndar". Við troðumst upp stigann og upp á efri hæðina....þar var ástæðan fyrir mannfjöldanum. Í miðjunni á stórum sal skein skært hin bjarta sól félagslífsins í formi diskókúlu. Hér voru öll félög skólans með kynningar á félagslífinu og ég get fullyrt það að engum þarf að leiðast í Lundi! Eftir daginn var búið að bjóða mér að vera í 6 nemendafélögum sem hvert um sig er með örlítið mismunandi áherslur í djamminu sem þau standa fyrir, búið að bjóða mér að vera með í þremur leikfélögum, vera sveitarforingi í skátasveit, ganga í heimavarnarliðið, stunda karate, vera í kvennaliði í fótbolta og sjá um minn eigin útvarpsþátt ! Allir voru mjög glaðir og áhugasamir um það að ég væri frá íslandi. Skátinn sem ég talaði við kunni að segja " ég skil ekki íslensku" og einn náungi úr leikfélagi kunni að segja "flottir skór, viltu r...a" sem er náttúrulega pottþétt pikköpp lína!

Ég steingleymdi að mæta í skólann klukkan eitt og sé ekki eftir því. Núna er ég að vinna í því að velja mér nemendafélag, eða Nation (sagt upp á enska mátann) til að vera með í. Það er nebblega þannig að the Nations eru með allskonar þjónustu og þar á meðal hjálpa til með húsnæði! Eftir því sem maður er duglegri að hjálpa til og vera virkur í félaginu þá fær maður fleiri punkta og fleiri punktar eru ávísun á að komast hraðar í húsnæði og fleira sem félagið býður upp á. Þannig að nú er bara að vera últra virk í félagslífinu í Lundi. Einnig sá ég það að eina leiðin til að læra sænsku er bara að vera með! með bara í einhverju sem fólk er að gera...þannig að það er planið :haha:

Þetta var gærdagurinn minn. Getur einhver toppað hann?

Nóg að gera í Svíþjóð

Wed, 03 Sep 2008 19:15:45 GMT

Hej hej. Jæja, á fimmtudaginn var fyrsti dagurinn sem við höfðum ekkert ákveðið mission fyrir daginn, ekkert sem bráðvantaði að redda, þannig að við fórum bara í smá könnunarleiðangur inn í Lund, fundum hvar ég átti að mæta í skólann á föstudaginn og svona. Komum svo heim og fundum okkur að sjálfsögðu eitthvað uppbyggilegt að gera. Fórum út í garð og leituðum fyrst heillengi að stiga. Fundum að lokum einn slíkan og skelltum honum upp við tré. Óskar hetja klifraði upp stigann og náði í eins og12 stykki epli sem við breyttum svo snarlega í magnaða eplaköku :haha:

Á föstudaginn var fyrsti skóladagurinn minn. Mætti í Kungshuset klukkan 13, ásamt ellefu öðrum nemendum...frekar undarlegt þegar maður er vanur að vera í hóp með svona hundrað nemendum. Fyrst voru bara ég og fjórir strjákar og ég var farin að halda að ég yrði eina stelpan, en svo komu tvær í viðbót. Það er líka alveg nýtt fyrir mér að meirihlutinn séu strákar. Var bara með stelpum í bekk meiripartinn af menntaskóla og svo var náttúrulega yfirgnæfandi meirihluti stelpur í sálfræðinnií H.Í. En þetta var annars bara mjög fínt. Allir voru voða indælir og kennararnir virkuðu mjög fínir. Ég var eina manneskjan sem talar ekki sænsku (annars voru tveir danir en þeir allavega þóttust alveg skilja sænsku) þannig að fyrst var byrjað á að útksýra að þetta færi fram á ensku til að byrja með vegna nemandans frá Íslandi...og svo var bent á mig. Svo komu þrír seint og í hvert einasta skipti þurfti að segja þeim frá því að íslenski nemandinn skildi ekki sænsku þannig að þetta væri á ensku fyrst um sinn...og í hvert skipti sem minnst var á íslenska nemandann litu allir á mig þannig að það voru allir með það á hreinu hvaða auli það var sem mætti og heimtaði að kennt væri á ensku :haha:
Á laugardaginn ákváðum við svo að skreppa yfir til Köben og fara í Tivoli í góða veðrinu. Það var náttúrulega frábært, kíktum fyrst aðeins í búðir, fórum svo í tívolí þar sem ég dró Óskar meðal annars í rússíbana og fallturn. Skemmtum okkur mjög vel :haha: Komum svo heim dauðþreytt um klukkan ellefu eftir klukkutíma ferðalag sem innihélt einungis tvær lestar, strætó og bílferð...en ég meina, við vorum náttla í öðru landi ;)

Á sunnudaginn var svo aftur alveg magnað veður og við skruppum að vatni sem er hér rétt hjá og lágum þar á ströndinni í sólbaði. Fórum um kvöldið niður í kjallara til að taka úr þvottavélinni. Vorum rétt komin niður þegar Óskar sá eitthvað hreyfast á gólfinu, brá solltið og þá sá ég það líka…eitthvað alltof stórt til að vera padda koma á miklum hraða í áttina til mín eftir gólfinu…ég panikaði og tók eins langt stökk upp tröppurnar og mínir íðilfögru löngu leggir leyfa, spólaði mig svo upp restina af stiganum og mitt í öllu þessu paniki náði ég að fatta hvað það var sem fór svona helvíti hratt yfir kjallaragólfið…það var froskur sem kom hoppandi…og svo kom annar! Fyrri froskurinn skoppaði undirstigann sem ég var nýbúin að líða upp áþokkafullan, hinn hoppaði inn í annað herbergi í kjallaranum. Óskar sá svo þriðja froskinn þegar hann var að koma upp eftir að hafa náð í þvottinn án minnar aðstoðar. Þannig að nú hafa þrír froskar bæst í íbúahópinn hér í sveitinni. Greinilega mjög gott að búa með okkur.

Á þriðjudaginn fór Óskar til Malmö á Tae kwon-do æfingu. Á æfingunni var tekið mjög vel á því...sérstaklega vel tekið á magavöðvunum. Það er skemst frá því að segja að Óskar vaknaði í gær með hrikalega strengi í maganum...hann er enn að reyna að rétta úr sér :haha: næsta æfing verður svo á morgun og það er spennandi að sjá hvort að Óskar muni geta farið uppréttur á hana eða ekki.
Annars er lítið annað nýtt að frétta, ég er búin að hanga mikið í Lundi í vikunni að gera hópverkefni...reyndar aðallega búin að hanga mikið í strætó til og frá Lundi í vikunni...en það er allt í lagi. Held að þetta sé allt það helsta í bili.
Strandar kveðjur heim í haustlægðirnar ;)

Sænsk símanúmer :D

Wed, 27 Aug 2008 12:41:25 GMT

Jæja gott fólk, hér eru nýju símanúmerin okkar:

Sólveig:+46 - 761156583
Óskar: +46 - 761156562

Skruppum aftur til Ystad í dag og kláruðum að sækja um personnumer (kennitölu). Mjög mismunandi hvað okkur er sagt að það taki langan tíma að ganga í gegn, allt frá viku og upp í þrjár vikur...vonum það besta :haha:
Annars erum við bara mest að brasa eitthvað svona sækja um hitt og þetta og horfa á Freinds inn á milli. Erum ekki búin að koma sjónvarpinu í gagnið ennþá þannig að við getum ekki enn horft á sænskt sjónvarp. Reddum því bara síðar. Hlakka annars bara mikið til að byrja í skólanum og fá smá rútínu í lífið :d

Eins og ég sagði frá í blogginu hér fyrir neðan fórum við í upplýsingamiðstöð fyrir útlendinga í gær. Ef þið eruð ekki búin að átta ykkur á því þá erum við útí sveit hér í Sverige...en kannski eru ekki allir búnir að átta sig á því hversu mikið út í sveit. Við erum allavega svo mikið út í sveit að samtalið okkar við konuna sem veitti upplýsingarnar var einhvernvegin svona:

Svíi: ...og hvaðan eru þið?

Við: Íslandi (mjög stolt á svipinn)

Svíi: ...og hversvegna fluttuð þið? (mjög hneiksluð)

Við: ...til að læra! (hissa og pínu móðguð)

Svíi: hvar búið þið núna?

Við: Näsby (aftur stolt af því að hafa fundið húsnæði)

Svíi HAHAHAHAHAHAHA

Svíinn hringir svo í samstarfskonu sína til að spyrja um upplýsingar og segja þessa bráðfyndnu sögu. Það sem hún sagði við samstarfskonu sína var nákvæmlega svona: hæ, það er par hér hjá mér frá Íslandi...og þau búa í Näsby!...hahaha já ég skil ekkert í þessu heldur! ...allavega þau vantar upplýsingar um sænskunám...hahahahaha.

Þetta fanst þeim mikill brandari...líklega eins og ef einhver segði við okku: hæ ég var að flytja frá Danmörku og nú bý ég á Langanesi og langar að læra íslensku....eða eitthvað álíka :haha:

Og til að gera fólki ennfrekar grein fyrir því hversu langt út í sveit við erum þá er hér lítil saga af Óskari:

Óskar fór út að skokka í gærkvöldi, móðgaði nokkrar sænskar beljur og þorði ekki að stoppa alla leiðina heim af ótta við að verða stangaður í neðri endann :haha:

Helstu fréttir komnar í bili.
Sænskar kveðjur á línuna, Sólveig og Óskar.

Bras og meira bras...

Tue, 26 Aug 2008 15:34:32 GMT

Já, Þá erum við búin að búa hér í tvo daga...öðrum deginum eyddum við í Köben þannig að hann telst nú eiginlega ekki með.

Skruppum sem sagt yfir í Danaveldi í gær og tæmdum HogM. Góður dagur í alla staði. Hittum mjög indæl sænsk hjón í lestinni á leiðinni til baka sem sögðu okkur reyndar að Sjöbo (næsti bær við okkur) hefði á sér frekar slæmt orðspor fyrir að vilja ekki útlendinga...en svo sagði konan "en þið lítið nú ekki út fyrir að vera útlendingar", þannig að...já ætli þetta reddist þá ekki :haha:

Í dag þeyttumst við út um allan Skán til að reyna að fá kennitölur og finna út strætóáætlanir og svona. Það er nú hægara sagt en gert skal ég segja ykkur. Fórum fyrst til Sjöbo og komumst að því að upplýsinga miðstöðin fyrir útlendinga er bara opin milli 10-12 og svo 13-15. Við komum akkúrat klukkan 12 þannig að við ákváðum að við gætum pottþétt fundið svona aðal strætóstoppistöð bæjarins hjálparlaust á þessum klukkutíma...en við gátum það ekki! Klukkan 13 hittum við ofsalega yndæla konu í upplýsingamiðstöðinni (hún var líka sjálf útlendingur) og hún gaf okkur fullt af gagnlegum upplýsingum. Frá henni fórum við til Ystad til að tala við skattinn og fá kennitölur. Við föttuðum hinsvegar ekki að taka með okkur leigusamninginn til að geta gefið upp fullt heimilisfang hér þannig að við þurfum að fara aftur á morgun.

Afrek dagsins eru sem sagt að við erum hálfnuð með að fá kennitölur, vitum númerið til að hringja í og fá upplýsingar um sænskunámskeið fyrir útlenginga, vitum hvar aðal strætóstoppistöðin er og vitum hvenær strætó gengur inn í Lund. Einnig á ég núna tannbursta og þarf ekki að nota Óskars lengur sem er alltaf mikil framför :haha:

Þannig að í dag var bara svona fram og til baka bras milli sænskra stofnana...hlakka til þegar það klárast allt saman!

Svo er hér linkurinn inn á myndirnar frá ferðinni fyrir þá sem ekki hafa séð þær :) www.picasaweb.google.com/oskgun

Sverige !

Sun, 24 Aug 2008 19:32:13 GMT

Jæja gott fólk. Ég er hér um borð í Norrænu,Óskar er í sturtu og ég hugsaði með mér “hvernig væri nú að blogga smá?”. Ég get rendar ekki sett þetta á netið strax, en ég ákvað að skrifa samt bara til að gleyma engu og til að geta vippað þessu á netið við fyrsta tækifæri.

Þegar við fluttum inn á Lokastíg voru framkvæmdir á Skólavörðustíg í fullum gangi, endalus hávaði og læti, einir sex gámar sem fúnkeruðu sem kaffistofa fyrir pólverja kúrðu beint fyrir utan hurðina okkar (oft djókað með það að gámarnir myndu fara um leið og við), ekki leið svo á löngu þar til framkvæmdir hófust einnig við húsið við hliðina á okkur og svo tóku við framkvæmdir á hallgrímskirkju. Það var því nóg um að vera í kringum okkur, framkvæmdalega séð í sumar og nákvæmlega engin bílastæði í boði. Það passaði svo að þremur dögum áður en við fluttum þá var haldin opnunarhátíð á skólavörðustígnum og daginn sem við fluttum...þá voru kaffistofugámarnir teknir ! ...ég á myndir til að sanna þetta.

Já...komin til Svíþjóðar ! og áfram heldur ferðasagan.

Lögðum af stað frá Lokastíg í blíðskapar veðri þriðjudainn 19 ágúst, komum við í vinnunni hjá Jóhanni og kvöddum hann og Möttu. Fórum svo í magnað hádegishlaðborð á Vox, þar sem helst stóð uppúr að hægt var að velja um fimm gerðir af eftirréttum! Lögðum svo af stað til Akureyrar (því að allar góðar ferðir byrja á ferð til Akureyrar) og vorum bara nokkuð ánægð með okkur, bílinn og allt dótið sem var bundið fast ofan á bílinn:haha: Komum til Ak í alveg jafn mikilli blíðu og borðuðum kvöldamat með öllum þessum allra náustu úr fjölskyldunni minni. Tókum svo miðvikudaginn rólega, margar kveðjustundir og fleira í þeim dúr hjá mér. Óskar var hinsvegar frekar upptekinn allan daginn við að brasa með pabba. Óska spurði pabba í sakleysi sínu á þriðjudagskvöldinu kvort að þeir gætu ekki reddað í sameiningu þriðju þverslánni uppá toppinn á bílnum og þá væri hægt að dreifa aðeins betur úr dótinu þar til að lækka bílinn. Pabbi hélt það nú. Og hver af þeim sem þekkir pabba heldur að hann hafi bara reddað einhverri spítudruslu til að setja yfir toppinn? ...hélt það, enginn. Það var náttúrulega ráðist í framkvæmdir og farið á blikkverkstæði og látið saga álstangir og búin til grind til að festa á toppinn :haha: Grindin kom sér mjög vel og var algjörlega frábær og er algjörlega framkvæmdagleði pabba og Óskars að þakka. Einnig bætti pabbi við plastdúk til að binda yfir allt draslið á toppnum og tryggja það algjörlega að ekkert myndi fjúka af.

Klukkan 7:30 á fimmtudagsmorgni var svo lagt af stað til Seyðisfjarðar. Ferðin þangað gekk bara mjög vel og leiðinda hljóð sem böggaði okkur meiripartinn af leiðinni norður...átti líklegast uppruna sinn í draslinu á toppnum...var alveg horfið. Við þökkum pabba og toppgrindinni góðu fyrir það. Við komumst alla leið til Seyðisfjarðar og var hleypt alveg vandræðalaust um borð í Norrænu. Pabbi og mamma fylgdu okkur alla leið og rúmlega það. Fóru eins langt út Seyðisfjörð og þau komust til að geta veifað okkur frá síðasta mögulega staðnum. Það var æði að sjá þau veifandi uppá kletti þegar við sigldum framhjá :haha: Pabbi gat að sjálfsögðu ekki komið til Seyðisfjarðar án þess að uppræta stórfellda glæpastarfsemi...fánarnir á höfninni voru ekki í réttri röð og íslenski fáninn var í röngum hlutföllum miðað við hina fánana og fánastöngina! Þetta fór gamli að sjálfsögðu með í sýslumann, lögregluna og hafnarstjórann og gerði mönnum grein fyrir fánalögunum. Væntalega hefur hann haldið langar ræður og útdeilt bæklingum með nákvæmum leiðbeiningum og viðbót frá eigin brjósti. Um borð í Norrænu fengum við þessa líka fínu káetu með kojum, sjónvarpi með fjórum sjónvarpsstöðvum (þar af ein sem var norrænustöðin og sýndi skjáauglýsingar eins og hvað er kokteill vikunnar), buxnapressu og hárþurrku! Fjandans lúxus á manni! Siglingin var í alla staði mjög góð. Hoppuðum aðeins í land í Færeyjum, fengum okkur kakó á kaffi natur og hlógum mikið að Reyða krossinum. Fleira skemmtilegt sem við gerðum um borð var að fara í bíó á Narniu mynd númer 2 og versla í fríhöfninni þar sem Ítalir og Frakkar slógust um 66°norður peysur. Siglingin hélt svo áfram til Hanstholm en þangað komum við klukkan 18 að staðartíma í gær. Fínasta veður þegar við komum í land, sól og blíða. Fundum okkur mjög fljótlega tjaldstæði, en þá kom í ljós að öll tjaldstæði á Íslandi eru mjög mikið 2. flokks!

Tjaldstæðið var rosalega slétt og fínt (enda í danmörku), frekar þétt setið en samt alveg nóg pláss fyrir okkur. Þegar við borguðum fyrir nóttina var okkur tilkynnt að við ættum svo endilega að mæta í bjór og partý en það myndi standa yfir til 10. Og þetta var almennilegt partý! 15 manna harmonikkuhljómsveit, einn spilaði á fiðlu, trommarinn söng og einn spilaði á sög! Meðalaldurinn um 70 ára og allir í rosalegum gír að dansa :haha: Við stoppuðum ekki lengi í partýinu samt og fórum fljótlega að sofa. Áður en við sofnuðum fékk ég samt mitt fyrsta melt down og fór að grenja þegar ég fattaði að ég var í Danmörku á leiðinni til Svíþjóðar og með engan miða heim! ...ónei en nýjar upplýsingar! hahaha en bæði Agnes og Sandra voru búnar að spá þessu, sést hverjir þekkja mann ;) Óskar var samt mjög duglegur að hugga mig :haha: Jæja, svo vöknuðum við bara fyrir allar aldir í morgun, fórum í búðina á tjalstæðinu þar sem við fengum nýbakað bakkelsi uppúr klukkan 7 (eins og ég segi, almennilegt tjaldstæði!). Við lögðum svo fljótlega af stað og stefndum á að koma við í Köben, skepnan (bílinn) alveg að meika lífið...or so we thought...damm damm!!! Við keyrðum og keyrðum, og svo fór nú losins að hiksta aðeins í skepnunni. Þannig að við ákváðum að taka smá hádegis matar og pissustopp. Keyrðum aftur af stað og allt í fína lagi með skepnuna...þangað til eftir svona klukkutíma þegar aftur fór að hiksta...aftur tekið stopp. Keyrt af stað og allt í lagi...þangað til eftir svona hálftíma! Og svona gekk þetta þangað til við komum hingað í húsið í Sverige. Einu sinni vorum við mjög desperat að finna stað til að soppa á að við enduðum inní einhverjum skógi og stoppuðum þar á afleggjara uppað túni hjá einhverjum bónda. Við ákváðum að fara bara alla leið í einum spretti í dag til að drífa í að koma dótinu okkar til Svíþjóðar...ef bíllinn hefði bilað þá hefði svosem ekki verið neitt mál að koma okkur á leiðarenda en dótið okkar hefði verið allt annað mál! Við fögnuðum ákaft þegar við komumst yfir brúna til Sverge og það fyrsta sem við gerðum var að fara á McDonalds :haha: Fundum svo loksins húsið eftir smá krókaleiðir og útúrdúra. Komumst að því að húsið er alltof stórt fyrir okkur tvö! Fólk bara verður að koma í heimsókn, við getum í alvörunni týnt hvort öðru hér...og ef einhver kemur í heimsókn þá erum við ekki alveg eins fáliðuð á móti öllum pöddunum...við erum bara tvö og þær eru solltið margar sko8| Óskar var samt algjör hetja áðan og spreyjaði fullt af einhverju pöddudrepandi efni niður í rifuna við útidyrahurðina...þar er fjöldagröf núna...líklega eru eftirlifandi pöddur farnar að ræða sína á milli um þjóðarmorð og stríðsglæpi, þannig að við þurfum liðsauka ef við eigum að lifa af!

Já...svo erum við bara komin hingar í húsið okkar, leeeeeengst útí sveit í Svíþjóð. Ég fékk melt down númer tvö þegar við komum hingað og fattaði hvað ég saknaði allra mikið! Óskar var líka mjög duglegur huggari þá :haha: En húsið er annars mjög fínt, mjög spes reyndar eins og að á efri hæðinni er hægt að opna hurði og þar fyrir innan er stigi sem virðist bara liggja ekkert en svo er líka þar fyrir innan lítið herbergi og hurð að stiganum uppá háaloftið...en við þorum ekki þangað...allavega ekki ég. Ekkert herbergi er málað eins og það er allt fullt af allskonar dóti, misjafnlega gömlu, út um allt. En þetta er allt saman mjög krúttlegt. Garðurinn er stór og fallegur og svo er bara sveit allt í kring með mjög stórum beljum útá túnum og svona.

Annað skemmtilegt að frétta af okkur er að í staðinn fyrir að sofa út í fríinu okkar tókum við bæði uppá þeim óvenjulega...ókei ekki svo óvenjulega fyrir mig...vana að sofa alls ekki út heldur byrja að vakna alltaf fyr og fyr á morgnanna! Sem er undarlegt þar sem að tímamismunurinn er okkur í óhað hvað það varðar. Við vöknuðum til dæmis fyrir klukkan 7 í morgun sem er í raun fyrir klukkan 5 á íslenskum tíma...og við erum ekki með vekjaraklukku í neinu formi....nema maður telji með uglur sem væla þangað til þær eru hásar í kringum tjaldstæðið.

Á morgun er svo planið að skreppa aftur yfir til dk og fara með lest til Köben á smá verslunarleiðangur. Upprunalega planið var náttúrulega að koma við þar en þar sem skepnan fór eitthvað að fá kvef var hætt við það plan. Við sjáum svo til hvernig gengur að versla og hvort við förum í Tivoli á morgun eða seinna í vikunni.

Held að þetta sé að verða fínt bara...nennir enginn að lesa þetta til enda! Til hamingju samt þeir sem gerðu það :haha: Blogga meira mjög fljótlega.

Kveðjur frá Sverige, Sólveig og Óskar.

Space bags !!!!

Thu, 14 Aug 2008 19:11:50 GMT

Hver...KAnnast ekki við að ...hafa EKKert pláss í fataskápnum? (lesist með rödd þularins í vörutorgi). Ég get svo svarið að space bags eru að fara að bjarga ferðinni! Var að testa og my oh my do they work ! hló eins og auli þegar ég var að lofttæma með ryksugunni :haha: ....og by the way þá keyptum við okkar space bags í rúmfó á 500 kall stykkið en ekki í vörutogi fyrir morð frjár;)

laters :haha:

Södra Näsbyvägen

Thu, 14 Aug 2008 16:25:06 GMT

Í gær skrifuðum við undir húsaleigusamning í Svíþjóð. Það sem við héldum var eftirfarandi: krúttlegt lítið hús með tveimur stofum, tveimur svefnherbergjum og eplatrjám í garðinum. Raunveruleikinn er eftirfarandi: 240 fermetra hús með tveimur stofum, fjórum svefnherbergjum, eplatrjám, perutrjám og kirsuberjatrjám í garðinum :haha: Við vissum ekki alveg hvað við áttum að segja við fólkið sem er að fara að leigja okkur þegar þetta kom smám saman í ljós. Héldum ró okkar þangað til við vorum komin út í bíl og fengum smá kast þar í sameiningu.

Fórum í hrikalega góðan mat til tengdó í Grindó í gær. Gunnsi, Óskar, Brynjar og Jóhann grilluðu humar mjög nákvæmlega eftir uppskriftinni. Stóðu fjórir yfir grillinu, sem er náttúrulega mjög nauðsynlegt. Einn til að snúa humrinum, einn til að vera alltaf með uppskriftina fyrir framan sig og skipa fyrir, einn til að vera tímavörður og einn bara svona til að grípa inní ef eitthvað klikkar...kannski ef sá sem er að lesa uppskriftina fær augnhár í augað eða ef snúarinn brennir sig...maður veit aldrei. Humarinn var allavega mjög góður :haha:

Annars er það helst að frétta að pökkunarferlið er hafið. Þar sem ég er með snert af controle freak í mér þá er ég náttla búin að vera að skipuleggja pökkunina í allt sumar og gera grilljón lista þegar ég hafði ekkert að gera í vinnunni. Skiptir náttúrulega öllu máli að hafa þetta allt mjög praktískt og pakka öllu "rétt";)

Allt komið í bili. Blogga meira þegar ég hef næst tíma...kannski verð ég þá komin til Svíþjóðar...hver veit !